Pieter ken sy spel

Pieter van Straaten is in beheer van Simonsvlei se kleinhandelstoor, waar sy flinke diens aan ons kliënte nie ongesiens verbygaan nie. Sy rustige geaardheid verklap niks van sy mededingende kant op die jukskeibaan nie.

Sedert kindsdae speel Pieter al jukskei - met onderskeiding! Hy is tans lid van die Oukraal-Jukskeiklub in die Paarl. Pieter het reeds verskeie provinsies in sy loopbaan by die Suid-Afrikaanse Jukskei-kampioenskappe verteenwoordig, onder andere Suid-Transvaal, Suidwes-Transvaal, Suid-Natal en die Boland.

Pieter is in 2007 weer gekies om Boland by die Suid-Afrikaanse Kampioenskappe te verteenwoordig, waar 22 unies teen mekaar gaan meeding. Hy is ook ‘n gereelde lid van die Suid-streekspan, wat gekies word uit die topspelers van die WP, OP, Noordweste, SWD en Boland.

Pieter is voorwaar ‘n uitblinker – Simonsvlei is trots op sy prestasies!